نص السؤال: يا شيخ أنا كنت أشتغل عسكري في الأفواج أفواج الحرس الوطني التي يقولون لها الشيبان البندق أو الجهاد وهي تورث من الأب أو الأخ وأنا ورثتها من أخوي وهو وارثها من أبوي رحمة الله عليهم جميعا، جلست فيها عشر سنوات لكن ما كنا نداوم كان مسموح لنا وبعد العشر سنوات قالوا تداومون شهر وتفكون شهر هنا ضاقت بي الأرض صارت هم بس أتخيل أني مداوم قلق وهم وتعب نفسي من الدوام وصرت أتغيب ويقفون راتبي أكثر من مرة، وإذا رحت كأني رايح لسجن ليش ما أدري. وكرهت حياتي علمًا أن الدوام ما فيه مشقة بس جالسين لكن شيء ما أقدر أوصفه وصار راتبي يتوقف كم مرة لأني ما أروح وبعدين طلبت من مرجعي يحولني للجنة الطبية عشان أتقاعد لأني كرهت الشغل.

وفعلا حولوني للجنة الطبية وفكوني لين تطلع قرار اللجنة ويوم جيت في المستشفى صرت أقول أشياء أصعب من اللي فيني عشان يقاعدوني كاره شيء اسمه الوظيفة وصاروا يصرفون لي علاج بس ما أكله وإذا سألوني قلت أكلت العلاج وأنا ما أكلته لأن كنت أبي بس التقاعد وفعلا اللجنة قررت تقاعدي وتقاعدت ومن يوم تقاعدت جاني هم ثاني أن راتب تقاعدي حرام وصرت خائف أنه ربا وعجزت أرتاح وأدق على المكتب حق مرجعي قلت برجع للوظيفة قالوا ما هو عن طريقنا عن طريق الوزارة

وأنا الحين خائف من الحرام إذا هو حلال بتطمني وأرتاح وإذا حرام علمني يا شيخ.